Team Philippines naka-gold dayon sa Hanoi SEAG

CEBU, Philippines — Bisperas sa pormal nga pagbukas sa 31st Southeast Asian (SEA) Games didto sa Hanoi, Vietnam, nakalangkat dayon og gold medal ang Team Philippines.

Kini kortesiya ni Francine Padios sa pencak silat event.

Gipukan ni Padios ang Indonesian nga si Puspa Arum Sari sa women's seni (artistic) tunggal (singles) finals aron angkonon aung unang puwesto. Nakakuha siya og 9,960 puntos samtang si Arum nakatali lamang og 9,945 puntos.

Gumikan niini, nadungagan ni Padios ang nabira nga medalya sa nasud nga naglangkob og duha ka silver ug susamang gidaghanon sa bronze gikan sa Kurash.

Nakasakmit sab og silver ang men's beach handball team.

Ang kickboxing team segurado na sab nga makatampo og medalya alang sa Team Phl.

Ang torneyo nga mahitabo kausa lamang sud sa duha ka tuig pormal nga magsugod karong adlawa didto sa My Dinh National Stadium sa Hanoi.

Ang pole vaulter nga si EJ Obiena maoy gitahasan nga flag-bearer sa delegasyon sa Pilipinas.