CEBU, Philippines — Si Jayson Tatum mipabuhagay og 29 puntos sa dihang gi-sweep sa Boston Celtics ang Brooklyn Nets, 4-0, sa ilang best-of-seven NBA Eastern Conference first-round playoff series kagahapon didto sa Barclays Center sa Brooklyn, New York.
Mipaulbo man tuod ang superstar sa Brooklyn nga si Kevin Durant og 39 puntos apan dili kini igo aron pungan ang gamhanang Celtics nga silyohan ang 116-112 nga daog nga maoy nakapatikangkang sa hingpit sa Nets.
Usa lamang si Tatum sa lima ka Celtics nga mikadlit og double figures. Si Jaylen Brown mikadlit og 22 puntos, samtang si Marcus Smart midugang og 20 puntos ug 11 ka assists.
Wala sab magpabitin si Grant Williams nga miposa og upat ka 3-pointers sa iyang 14 puntos samtang si Al Horford midugang og 13 puntos alang sa Celtics nga mi-abante sa ikaduhang hugna sa playoffs diin ilang sangkaon ang modaog sa serye tali sa defending champion Milwaukee Bucks ug Chicago Bulls.
Sa laing mga duwa, nalugwayan pa ang season sa Toronto Raptors human gipakgang na sab nila ang Philadelphia 76ers, 103-88, samtang ang Dallas Mavericks milampaso sa Utah Jazz, 102-77, aron pagposte og 3-2 nga bentaha sa kaugalingon nilang serye.
Ang 76ers miharos og daog sa nag-unang tulo ka duwa sa serye apan ang Raptors miresbak pinaagi sa duha ka sagunson nga daog hinungdan nga nanginahanglan na lang kini og usa ka daog aron tablahon ang serye ug makapuwersa og Game 7.
Sa gihapon, ang alas sa Sixers nga si Joel Embiid miduwa bisan og nayayay ang kumagko apan nalimitahan kini ngadto lamang sa 20 puntos. Hilom sab sila si James Harden ug Tyrese Maxey nga nagkumbinar og 27 puntos sa pilderong kawsa.
Si Pascal Siakam maoy nangu sa Toronto uban ang 23 puntos samtang sila si O.G. Anunoby ug Gary Trent Jr. miamot og 16 puntos matag usa.
Didto sa Dallas, nagmangtas na sab si Luka Doncic nga miratsada og 33 puntos uban ang 13 ka rebounds ug lima ka assists alang sa Mavs. Giabagan siya ni Jalen Brunson ug Dorian Finney-Smith nga nagkumbinar og 37 puntos.