CEBU, Philippines — Ang Sugbuanong chess prodigy nga si National Master Jerish John Velarde mipaambit na sab og kadungganan sa iyang mga kababayan.
Kini human ang garbo sa dakbayan sa Lapu-Lapu misakmit og duha ka gold medals alang sa Pilipinas sa 2022 ASEAN Age Group Chess Championship Zone 3.3 ning bag-ohay pa lamang.
Ang 15-anyos nga si Velarde mipukan sa iyang kabayan nga si Michael Jan Stephen Inigo sa ikasiyam ug katapusan nga hugna aron dominahon ang Under 16 open division uban ang 8.0 puntos.
Labaw siya og usa lamang ka lugas ni silver medalist Prin Laohawirapap sa Thailand. Ang Vietnamese nga si Le Dang Thanh An maoy mi-angkon sa bronze uban ang 7.0 puntos.
Ang scholar sa Marie Ernestine School sa Lapu-Lapu nakabira sab og bulawang medalya sa team event.
Dalaygon kaayo ang salida ni Velarde ning higayona ilabi na kay naka-silver lamang siya sa 2018 nga edisyon sa torneyo nga gipahigayon didto sa Davao City sa mas bata nga kategoriya.
Ang labing uwahi niyang kadaogan nakapadasig ni Velarde nga gukdon ang iyang damgo nga mamahimong Grandmaster sama sa iyang mga idolo nga sila si Wesley So ug Eugene Torre.