Harden di makaduwa sa All-Star game         

CEBU, Philippines — Ang bag-ong nakuha nga superstar sa Philadelphia 76ers nga si James Harden dili makapakita'g aksiyon sa giatngan nga NBA All-Star Game lima ka adlaw gikan karon.

Kini gumikan kay si Harden padayon pang nagpa-alim sa iyang hamstring injury. Mao kini ang hinungdan nganong nakapalta siya og pipila ka mga duwa sa dihang didto pa siya sa poder sa Brooklyn Nets .

Si Harden, nga nabira sa Sixers pinaagi sa usa ka trade nga naghatud ni Ben Simmons ngadto sa Nets, hulipan sa sentro sa Cleveland Cavaliers nga si Jarrett Allen sa team ni LeBron James.

Gawas nga dili makasalida sa All-Star, si Harden dili sab makatikang sud sa korte sa umaabot nilang duha ka duwa batok sa Boston Celtics ug Milwaukee Bucks.

Si Harden gikuha ni James human siya gi-isnab sa kanhi niya teammate sa Nets nga si Kevin Durant atol sa pagpiniliay sa All-Star lineups sa miaging semana. Ang NBA All-Star game gikatakda nga duwaon karong Lunes (Pebrero 21, oras dinhi sa Pilipinas) didto sa Cleveland.