CEBU, Philippines — Kay nagsugod na pagkunhod ang mga kaso sa Covid-19 didto sa Metro Manila, ang PBA Board of Governors nakahukom atol sa ilang miting niadtong Lunes nga ibalik ang nahunong nga aksiyon sa Governors' Cup unya sa unang semana sa Pebrero.
“Lahat agree na mag-restart, hopefully by first week of February,” matud pa ni PBA commissioner Willie Marcial.
Duha ka semana pa lamang sukad sa pagsugod sa liga didto sa Smart Araneta Coliseum, ang PBA boluntaryong misuspenso sa mga duwa niini tungod sa paspas nga pagdaghan sa mga nataptan sa gihakadloang virus sa nasud nga nakapuwersa sa kagamhanan pagbutang sa Metro Manila ubos sa Alert Level 3.
Si Marcial nagkanayon nga ang liga naghuwat na lang karon sa go-signal gikan sa mga hintungdang LGUs pinaagi sa Metro Manila Development Authority (MMDA) aron ang mga teams magkasugod na sa ilang praktis.
Ang mga teams hatagan og 10 ka adlaw aron mopahigayon og scrimmage sa dili pa ipadayon ang kumbati sa Governor's Cup.
“Okay na kami sa GAB (Games and Amusements Board) and kailangan na lang ng go-signal from the LGUs,” dason pa ni Marcial. “Magre-request kami through MMDA Chairman Benhur Abalos para makapag-start na uli ng scrimmages. After 10 days ng scrimmages, game na tayo.”
Sa kasamtangan, ang Magnolia Hotshots maoy naghari sa liderato uban ang perpektong 3-0 record ug gisundan kini sa Meralco Bolts nga wala pay pilde sa duha ka duwa.
Nagbarog sa ikatulo ug ikaupat nga puwesto ang NLEX Road Warriors (4-1) ug defending champion Barangay Ginebra Kings (3-1) samtang ang Alaska Aces. Phoenix Super LPG Fuel Masters, ug San Miguel Beermen nagtabla bitbit ang parehong 3-2 nga baraha.
Ang NorthPort Batang Pier (0-4) ug Blackwater Bossing (0-5) mao na lang ang way daog nga mga koponan.