CEBU, Philippines — Ang rookie nga si Cam Thomas mipasud sa iyang itsa sa nahibilin nga 1.7 segundos sa overtime aron aswaton ang Brooklyn Nets ngadto sa 121-119 nga kadaogan batok sa San Antonio Spurs sa NBA kagahapon didto sa Barclays Center sa Brooklyn, New York.
Si Kevin Durant mitapos uban ang 28 puntos samtang si James Harden midugang og 26 puntos, 12 ka assists ug pito ka rebounds alang sa Nets nga midaog didto sa ilang korte sa labing unang higayon sukad niadtong Disiembre 16.
Ang Nets abante unta og 12 puntos sa pinal nga 4:59 sa regulasyon apan kalit lang mikolapso hinungdan nga nakagukod ang Spurs ug nakapuwersa og overtime human sa 3-pointer sa rookie niining si Josh Primo sa hilimatyong segundos.
Si Durant nakapasud lamang og usa ka basket sa dugang singko minutos sa aksiyon apan namawi sa dalaygon nga paagi tungod kay siya man maoy nagpasa sa bola nga miresulta ngadto sa tres ni Thomas nga nagsalabar kanila.
"I was open so I made a play. Either shoot a three or get to the hoop -- I got to the hoop, did a floater. Good basketball play," matud pa ni Thomas. "I just trust the work I put in," he said. "I put in a lot of work so I'm always ready whenever KD or James kicks it to me in a situation like that."
Sa laing duwa, ang Los Angeles Clippers dali nga nakabangon sa miagi nilang kaparotan sa Memphis Grizzlies ug gipahimungtan sa ilang kapungot ang Atlanta Hawks, 106-93.
Si Amir Coffey mitabla sa iyang career-high nga 21 puntos samtang si Serge Ibaka miamot og 16 puntos alang sa Clippers, nga padayong wala ang duha ka nanga-angol nga mga bitoon nga sila si Kawhi Leonard ug Paul George.