ABAP seminar sa Cebu nagmalampuson

CEBU, Philippines — Ang mga partisipante sa Association of Boxing Alliances in the Philippines (ABAP) seminar alang sa mga coaches ug trainors gibati og tumang kalipay ug katagbawan human makumpleto ang tulo ka adlaw nga kurso didto sa Chao Sy Gym nga naa mahimutang sa second floor sa Yu Wei Tong building sa Barangay Ermita, dakbayan sa Sugbu.

Atol sa simpleng seremonyas pagtak-op sa maong kalihukan niadtong Miyerkules, giduyogan sila ni ABAP-Central Visayas regional director Lorenzo "Chao" Sy, Australian coach Donald Walter Abnett, ang garbo sa Sugbu nga si Ronald Chavez nga maoy head coach sa mga elite boxers sa national team, ug kanhi Olympian Violito Payla.

Si Abnett, nga maoy mipahigayon sa seminar, mipaambit sa mga nanambong og usa ka organisado, sistematiko ug sports science-based approach sa Team Phl, nga nakamugna og positibong resulta sa mga internasyonal nga kompetisyon apil na ang makasaysayanong kampanya sa nasud sa 2020 Tokyo Olympics niadtong Agosto didto sa Japan.

Sa iyang bahin, si ABAP Executive Director Ed Picson nagkanayon nga nagpasiugda sila og serye sa mga coaching clinics aron ilang mapadangat ang mga bag-ong teknolohiya ug pamaagi ngadto sa mga trainors lukop nasud. Kabahin sab kini sa ABAP Coaches Development Program nga naglaraw makadiskubre og posibleng mga bag-ong miyembro sa national coaching staff. Namahayag alang sa tanang mga coaches, si Edito Villamor sa Villamor Brothers Gym sa Pagsabungan, Mandaue City mipadayag nga mapasalamaton kaayo sila si ABAP sa paghatag kanila og oportunidad nga makat-on sa labing bag-ong teknik kabahin sa amateur boxing training.

"In today's generation, there are really changes in the training program and coaching the kids," paambit pa ni Villamor. "That is why we are very grateful that we were updated on the new technologies about training and coaching developmental boxers through this endeavor."

"It's a huge addition to our know-how in developing the skills of young aspiring fighters especially those who just started in boxing," dugang pa ni Villamor. "And as a trainer, I learned a lot particularly on the pattern introduced to us by coach Don Abnett. Our profound thanks to  ABAP through sir Ed Picson and regional director Chao Sy for initiating this relevant and worthwhile undertaking for Cebu coaches."