CEBU, Philippines — Ang Atlanta Hawks ug ang Los Angeles Clippers nakalabtik na sab sa ilang mga karibal aron tablahon ang tagsa-tagsa nila ka best-of-seven NBA conference semifinals series sa baraha nga 2-2 kagahapon.
Si Trae Young mipabuhagay og 25 puntos ug 18 ka assists sa dihang gipakaging sa Hawks ang Philadelphia 76ers, 103-100, sa Game 4 sa ilang Eastern Conference second round playoffs.
Miamot si Bogdan Bogdanovic og 22 puntos, si John Collins mi-iskor og 14 ug milangkat og 12 ka rebounds samtang si Clint Capela mitali og 12 puntos ug 13 ka rebounds sa Hawks nga madasigon mibangon human malubong og 18 puntos sa first half dayon na ngadto sa pagpatikalbong sa Sixers.
Si Tobias Harris mipupo og 20 puntos samtang si Joel Embiid mikadlit og 17 puntos ug 21 ka rebounds sa pilderong Sixers, nga giwani sa Hawks sa second half, 54-38.
Didto sa Los Angeles, si Kawhi Leonard ug Paul George parehong mirehistro og 31 puntos sa dihang gibaslan sa Clippers ang Utah Jazz, 118-104, sa ilang West semis series.
Si Leonard nagbilin og marka tungod sa makalisang niyang dunk ibabaw ni Derrick Favors nga nakahatag sa Clippers og 62-38 nga labaw sa nahibilin nga 1:24 sa ikaduhang kuwarter.
Mihimo sab og kasikas si Marcus Morris nga miposa og lima sa unom niya ka tres aron pagtapos uban ang 24 puntos sa Clippers. Si Donovan Mitchell maoy nangu sa misukarap nga Jazz uban ang 37 puntos. Sila si Joe Ingles ug Bojan Bogdanovic nagkumbinar og 37 puntos alang sa Jazz nga nasagunsonan og duha ka pilde sa playoffs sa labing unang higayon ning season.