CEBU, Philippines — Ang kanhi WBO welterweight champion nga si Tim Bradley namahayag nga iyang gipaboran og gamay si Errol Spence apan dili na siya ma-surprisa pa kon ugaling pildihon kini ni Manny Pacquiao. Si Bradley nasayud kon unsa'y kalibre ni Pacquiao gumikan kay tulo ka higayon sila nga nag-abot ibabaw sa ring. Midaog siya sa una nilang engkuwentro pinaagi sa kontrobersiyal kaayo nga desisyon apan gikulata siya ni Pacquiao sa sunod nila na duha ka sangka.
“I’m going to favor Spence slightly,” dason pa ni Bradley sigun sa taho ni Sean Crose sa boxinginsider.com.“But I wouldn’t be surprised if Pacquiao could pull it off.” Nagtoo si Bradley nga ang 42-anyos nga si Pacquiao dunay kapasidad nga bihagon ang inilog kaayong si Spence, nga maoy WBC ug IBF welterweight champion sa kasamtangan.
Depensaan sa 31-anyos nga si Spence (27-0, 21KOs) ang duha niya ka mga bakus batok ni Pacquiao (62-7-2, 39KOs) karong Agosto 21 didto sa MGM Grand Hotel sa Las Vegas, Nevada.