CEBU, Philippines — Giklaro ni Manny Pacquiao nga mokatkat pa siya og usab sa boxing ring. Mao kini ang gipasiatab ni Pacquiao atol sa usa ka press conference niadtong Lunes.
Si Pacquiao mitug-an nga gisugdan na ang sabot-sabot, apan dili pa niya isulti ang mga detalye aron malikayan ang problema.
Wala niya gibutyag ang posibleng petsa sa sunod away ug kontra niini. Aduna hinuo'y pipila ka mga pangan ang milutaw aron mamahimong sunod makontra ni Pacquiao.
Si Pacquiao gikatakda untang makigsinukliay og kumo sa walay pildeng WBO welterweight champion nga si Terence Crawford karong Hunyo didto sa tunga-tungang sidlakan. Apan nadiskaril kini human ang mga mipasalig nga mobubo og pundo alang sa maong higanteng away didto sa Abu Dhabi, United Arab Emirates wala makatuman sa ilang saad.
Milutaw sab ang pangan sa wa'y pidleng WBC ug IBF welterweight champion nga si Errol Spence nga maoy lagmit sunod makaharong ni Pacquiao.
Wala na siya makapakita pa'g aksiyon sukad iyang gibuntog si Keith Thurman aron langkaton ang WBA 'Super' welterweight title niadtong Hulyo 2019.
Kon madayon, mao kini ang katapusang away ni Pacquiao, ang bugtong eight-division world champion sa kasaysayan.