CEBU, Philippines — Sila si Kristaps Porzingis ug Luka Doncic maoy milugwa nga bida sa dihang gipakaging sa Dallas Mavericks ang San Antonio Spurs, 115-104, sa NBA kagahapon didto sa American Airlines Center sa Dallas, Texas.
Ang 7-footer nga sentro mipatuasik og 28 puntos ug 14 ka rebounds samtang si Luka Doncic mirehistro og triple-double uban ang 22 puntos, 12 ka rebounds ug 12 sab ka assists alang sa Mavericks nga kontrolado kaayo ang duwa sukad misutoy ngadto sa sayong 32-27 nga labaw.
Nanginit man tuod ang Spurs sa ikatulong kuwarter apan ang Mavericks misira sa duwa pinaagi sa nagkayong 28-18 rally aron angkonon ang 11 puntos nga kadaogan. Ang Mavs nagtangag na karon og 18-16 nga baraha samtang ang Spurs, nga gipangulohan ni DeMar DeRozan uban ang 30 puntos ug 11 ka assists, natagak ngadto sa 18-14.
Sa laing aksiyon, si Jonas Valanciunas mipabuto og 29 puntos ug milangkat og 20 ka rebounds aron pangulohan ang Memphis Grizzlies ngadto sa 127-112 nga paglatos sa Washington Wizards. Dako sab og natampo si Ja Morant nga mikadlit og 21 puntos ug 10 ka assists ug ingon man ang rookie nga si Desmond Bane nga miposte og career-high 20 puntos alang sa Grizzlies nga nagbitbit na karon og 17-16 win-loss record.
Si Bradley Beal mikimada og 21 puntos apan mipasud lamang og unom sa 22 niya ka itsa samtang si Russell Westbrook mihipos og 20 puntos, lima ka rebounds ug 10 ka assists sa pilderong kawsa.