Lakers nakalingkawas batok Celtics
CEBU, Philippines — Daw sa naibtan og tunok ang Los Angeles Lakers human si Daniel Theis wala mapakasud sa iyang follow-up shot dayong tingog sa buzzer.
Ang Lakers nakalingkawas uban ang 96-95 nga daog batok sa Boston Celtics sa kulbahinam nilang duwa sa NBA kagahapon didto sa TD Garden sa Boston, Massachusetts.
Si Anthony Davis nga maoy pagbalik og duwa, maoy responsabli sa maong daog nga mihabwa og 27 puntos ug milangkat og 14 ka rebounds.
Wala sab magpa-alkansi si LeBron James, kinsa mitali og 21 puntos, pito ka rebounds ug pito sab ka assists, ingon man si Montrezl Harrell nga mikandos og 16 puntos sa Lakers, kinsa napilde ngadto sa Detroit Pistons niadtong Biyernes dihang wala moduwa si |Davis.
Si Jayson Tatum mihipos og 30 puntos ug siyam ka rebounds aron mangu sa tanang scorers sa Celtics. Si Jaylen Brown mitampo'g 28 puntos sa Boston nga napilde og kalima sa ilang katapusang pito ka duwa.
Sa laing aksiyon, usa ra sab ka punto ang nadag-an sa Heat sa ilang pakigbatok sa Sacramento Kings sa iskor nga 105-104, apan ang Houston Rockets walay kukaluoy nga miluglog sa New Orleans Pelicans, 126-112 ug gilubong sab sa Charlotte Hornets ang Milwaukee Bucks sa iskor nga 126-114.
- Latest
