Pacquiao-McGregor fight mahitabo karong tuiga
CEBU, Philippines — Masaligon ang boxing coach ni Conor McGregor nga si Phil Sutcliffe nga ang iyang batos magkasangka ni eight-division bnoxing champion Manny Pacquiao karong tuiga.
Gani gipadayag ni Sutcliffe ang ilang plano nga ipalawom sa duha ka bulan nga boxing camp si kanhi two-division UFC world champion human sa iyang sangka batok ni Dustin Poirier sa UFC 257 karong Enero 24 didto sa Etihad Arena sa Yas Island, Abu Dhabi.
“85 to 90% chance (of the Pacquiao fight happening) maybe March, April or May,” matud pa ni Sutcliffe ngadto sa ESPN. Niulbo ang tabi-tabi sa posibleng sangka tali nilang Pacquiao ug McGregor sa miaging tuig human ang duha ka premyadong mga payter nikompirmar nga ang ilang kampo nipasumbingay sa usa'g-usa.
Gipadayag sab ni McGregor niadtong nakalabay nga mga adlaw nga ang sabot-sabot uban sa kampo ni Pacquiao nagkakusog, sinyales nga ang away padung sa saktong direksiyon.
Si McGregor unang ningindahay sa boksing niadtong 2017 batok sa walay pildeng Amerikano nga si Floyd Mayweather Jr., kinsa mipaundang kaniya sa ika-10 nga hugna.
Napilde man tuod, apan si McGregor sa walay duha-duha gusto pa gihapon nga moaway sa boksing ug ning higayona batok ni Pacquiao.
Dili pa lang dugay, si ang 42-anyos nga si Pacquiao mipahibalo nga gusto niya masinati ang away sa usa ka mixed martial artist sama ni McGregor.
Si Pacquiao wala na makaaway human sa iyang kadaogan batok ni Keith Thurman niadtong Hulyo 2019.
- Latest
