CEBU, Philippines — Andam si Pinoy IBF super flyweight champion Jerwin Ancajas (32-1-2, 22KOs) nga makigsangka bisan kinsa sa duha ka mga kampiyon sa ilang dibisyon nga sila si Roman 'Chocolatito' Gonzalez (50-2, 41KOs) sa Nicaragua ug Juan Franciso Estrada (41-3, 28KOs) sa Mexico.
Si Ancajas seryosong nagtan-aw sa telebisyon didto sa temporaryo niyang balay sa Los Angeles dihang sila si Gonzalez ug Estrada milampos pagdepensa sa ilang super flyweight titles niadtong Sabado didto sa Mexico.
Ang kanhi pound-for-pound king nga si Gonzalez mipukan sa Mehikanong si Israel Gonzalez pinaagi sa "unanimous decision" aron pagdepensa sa iyang WBA super flyweight title, samtang si Estrada nakabangon human matumba sa ikatulong hugna dayon na ngadto sa pagpalukapa sa kababayan niining si Carlos Cuadras sa ika-11 nga hugna aron pagpabiling kampiyon sa WBC 115-pound division.
Dako og posibilidad nga mag-"rematch" sila si Gonzalez ug Estrada sa tuig 2021, apan ning sayo pa si Ancajas mipadayag nang daan nga buot niyang harungon ibabaw sa ring bisan kinsa nilang duha.
Sa kasamtangan, si Ancajas nag-ensayo alang sa ikasiyam niyang pagpanalipod sa iyang korona sa IBF lagmit batok sa Mehikanong si Jonathan Rodriguez, apan wala pa'y gikatakda nga petsa ug binyu niini ang Top Rank Promotions ni Bob Arum.