Casimero gusto nang mouli

CEBU, Philippines — Human sa taas-taas nga paabot nga milanat og dul-an siyam ka bulan aron moaway sa Amerika nga natapos pinaagi sa dalaygon niyang pagkulata sud lamang sa tulo ka hugna ni Duke Maicah niadtong Domingo didto sa Mohegan Sun Hotel and Casino sa Uncasville, Connecticut, si WBO bantamweight champion John Riel "Quadro Alas" Casimero nagpanikad karon nga makapauli ug mogahin og oras uban sa iyang pamilya didto sa Ormoc City.

Si Casimero milupad sa Las Vegas niadtong Pebrero alang sa unification bout nila IBF/WBA bantamweight champion Naoya "The Monster" Inoue sa Japan nga gikatakda unta niadtong Abril, apan nauswag kini tungod sa pandemiya.

Apan human sa pipila ka pagsibog, si Top Rank promoter Bob Arum hingpit nga mikanselar sa giatngan nga away tungod sa ekonomikanhong rason.

Mao kini ang nakapaaghat ni MP Promotions President Sean Gibbons nga padepensaon na lang si Casimero sa iyang titulo batok ni Maicah.

Nagkanayon ang 31-anyos nga si Casimero nga ang wa'y hunong niyang training nakatabang og dako aron magpabilin siya sa ensaktong porma ug kondisyon dayon na ngadto sa pagpakita og impresibong away batok ni Maicah.

Bisan og aduna na siya'y daghang opsiyon alang sa sunod niyang away, si Casimero miingon nga ang sud karon sa iyang huna-huna mao ang pagpauli gumikan kay gigil na kaayo siya nga gakson ug hagkan ang ang duha niya ka mga anak, ang dos anyos nga si Princess Yuri ug ang walo pa ka bulan nga si Queenie Yvanna nga wala pa niya igkita.