CEBU, Philippines — Si PBA commissioner Willie Marcial nagkanayon nga ang team workouts nga giaprubhan sa kagamhanan limitado lamang ngadto sa upat ka players matag batch diin sila mopahigayon og indibidwal nga drills ug conditioning. Nanghinaut si Marcial nga tugotan na ang mga PBA teams nga makapahigayon og scrimmage sunod bulan.
Ning puntoha, mipahimangno si Marcial nga ilang silotan kadtong molapas sa mga patakaran alang sa kaluwasan ug panglawas nga giplastada sa liga alang sa tanan niining ginsakoupan. “May fines pag nag-violate. First offense is P20,000 then it will double to P40,000, P80,000,” matud pa ni Marcial segun sa taho sa The Philippine STAR.
Giisyu ni Marcial ang maong warning human sila si Japeth Aguilar sa Barangay Ginebra ug Adrian Wong sa Rain or Shine nasakpan nga miduwa og pick up game bisan og gidili pa kini karong panahona. Ang duha gipamulta ni Marcial og tag P20,000 uban ang 14 ka adlaw nga kwarantin ug 30 ka oras nga community service. Gawas niini, kadtong molapas sa mga lagda lagmit makadawat sab og laing silot gikan sa ilang teams, matud pa ni NLEX coach Yeng Guiao. “If you fail to follow our protocols, aside from the PBA, there will be a penalty from the teams internally, so it’s a double whammy,” sumala pa ni Guiao. “Five-on-five is still strictly prohibited based on the regulations of the IATF.”