CEBU, Philippines — Si heavyweight champion Tyson Fury namahayag nga iyang gidawat ang tanyag nga makigsangka batok sa 53-anyos nga si Mike Tyson sa usa ka charity boxing match.
Gawas ni Fury, si Tyson nakalinya sab alang sa usa ka rematch batok sa karibal niyang si Evander Holyfield na hapit na sab mag-senior citizen sa edad nga 57.
Apan sa pagka karon, ang away pa lang ni Tyson batok sa 31-anyos nga si Fury ang hingpit nang nasabotan.
Si Tyson mipahibalo nang daan nga moaway siya og balik sud lamang sa upat ka hugna nga mga exhibition bouts.
Iya kining buhaton alang sa mahinungdanong kawsa kay duna siya buot tabangan ilabi na niadtong mga apektado ug labing nanginahanglan ning panahon sa pandemya.
Sa iyang bahin, si Fury nagkanayon nga sa dihang nakadawat siya og tawag aron iparang siya batok ni Tyson nga nagkupot sa record isip labing bata nga heavyweight boxing champion sa kasaysayan, iya dayon kining gidawat sa wa'y pagduha-duha. "Yeah, I had a phone call saying ‘would you like to fight Mike Tyson in an exhibition fight?’ I was like ‘hell yeah!’" matud pa ni Fury ngadto sa BT Sport.