CEBU, Philippines — Hitsas na ang upat ka teams nga mobanat sa crossover semifinals sa 1st Dayon Basketballl League (DBL) Invitational Tournament diha sa Sambag 1 Sports Complex, Dakbayan sa Sugbo..
Gikan sa 14 ka teams nga nisalmot sa maong liga nga giorganisar ni konsehal Allan Glen Abella, upat na lang ka koponan ang mag-ilog sa kampiyonato nga nagtangag og P15.000 nga ganti.
Ang upat ka teams mao ang no. 1 TSO 'N Co. ug no. 2 AMCOD Trading sa bracket A ug no. 1 Jas Burger ug no. 2 Shumava Residence sa bracket B.
Ang mga modaog maoy mag-abot sa finals, samtang ang mga pildero mag-ilog na lang alang sa ikatulong puwesto.
Kon walay kausaban, ang semifinals duwaon karong Sabado, Marso 21.
Magsangka sa unang duwa nga gikatakda sa alas-5 sa hapon mao ang TSO 'N Co. batok Shumava Residence ug sundan sa duwa tali sa Jas Burger ug AMCOD Trading sa alas-7 sa gabii.
Ang mga mananaog maoy mag-abot sa finals inig Domingo, Marso 22, samtang ang mangapilde magtigi alang sa ikatulong dapit.
Kining liga nahimo pinaagi sa paningkamot sa aktibong konsehal sa Sambag 1 nga si Allan Glen Abella.
Gisuportahan kini sa Dayon Enterprises and Printing Press, AJ Sportswear, Atisor Cakes Art and Design, Sisig Teriake ug Cebu's Tasty.
Ang mga duwa ubos sa superbisyon ni Edwin Dejacto Sr. sa CEBRA.