CEBU, Philippines — Nakalabang sa lawod sa kalisdanan ang Yoyi's Pastries & Desserts dihang ilang napuhalan sa kalami ang ilang kompitensiya nga Bro J. Bakery, 85-84 sa kulbahinam nga kampiyonato aron koronahan isip hari sa FYA Basketball Tournament Season 24 Soontit Construction Cup niadtong Martes diha sa Atillo gym sa Punta Princesa, Dakbayan sa Sugbo.
Sakit kaayo ang kapildihan sa Bro J Bakery kay sila man ang pirmeng naglabaw gikan sa pagsugod ug sa hinapos nga bahin pa gyud sa duwa sila nadiskaril hinungdan nga nilabaw og usa ka lugas ang Yoyi's Pastries & Desserts, 85-84.
May purohan unta nga modaog ang Bro J Bakery sa dihang ila ang ball possession sa nahibiling tres segundos, apan wala masulod ang dul-it nga tira ni Justine Urot nga nakahanaw sa ilang paglaum.
Si Reyboy Caballes maoy nangulo sa upat ka Yoyi's Pastries & Desserts players nga mitama og double figures pinaagi sa iyang 21 puntos.
Nanginit sab si Jao Rabadon ug miamot kini og 19 puntos, ang team manager nga si Ahlmark Albarracin mitampo'g 12 puntos, samtang si Carl Cababahay miambit og 10 puntos sa tungason nga kadaogan sa Yoyi's Pastries & Desserts.
Ang Bro J Bakery gipangulohan sab ni Daniel Enriquez nga mipatuasik og 25 puntos, gisundan ni Urot nga adunay 12 puntos.
Si Ranel Patalita ug ang team manager nga si Junrey Arreglo nag-amotay og 11 ug 10 puntos sa wa'y swerting Bro J Bakery.
Sa gubat alang sa ikatulong dapit, ang Masterline Utap nimasaker sa Purefit Gym, 120-101 ubos sa giya ni Socrates Aglipa nga mipaarak og 24 puntos.
Ang Masterline Utap ni Noel Medalle nakakuha sab og igong suporta gikan ni James Jabonero nga mikamada og 23 puntos, ingon man ni Francis Paracuelles ug Jamel Eriso nga mitimbre'g 20 ug 16 puntos matag usa.
Miburak sab og 24 puntos si Jim-Jim Rara aron mangulo sa napildeng Purefit Gym.
Wala sab magpaalkansi ang team manager nga si Mclain Alkuino ug mitikdol kini og 23 puntos, miiskor sab og 20 puntos si Val Ramirez, samtang si Gabriel Aguilar mikamada og 14 puntos sa Purefit Gym.
Sa laing bahin, si Winston 'Tuko' Gabucan sa Purefit Gym maoy gibayaw nga Season MVP.
Awtomatik siya nga nangulo sa Mythical Five uban nilang Reyboy Caballes ug Jao Rabadon sa Yoyi's Pastries & Desserts, Justine Urot sa Bro J Bakery ug Socrates Aglipa sa Masterline Utap.
Si Stephen Lumagbas sa Masterline Utap maoy gitunolan sa 'sportsmanship' award.
Ang liga nagmalampuson tungod sa pagtinabangay sa tanang miyembro sa FYA Ballclub ubos sa liderato sa presidente niining si Dexter Caballero.
PUNTOS MATAG USA
Unang duwa:
MASTERLINE (120) – S. Aglipa 24, Jabonero 23, Paracuelles 20, Eriso 16, Cabasan 9, Lumagbas 8, Bocado 8, Engaling 5, Perami 4, Tandoy 2.
PUREFIT (101) – Rara 24, Alkuino 23, Ramirez 20, Aguilar 14, Dante 8, Pepino 5, Montillero 2, Cabreros 2.
Ikaduhang duwa:
YOYI'S (85) – Caballes 21, Rabadon 19, Albarracin 12, Cababahay 10, Lastomen 9, Limbaga 6, Mata 6, Canoy 2, Enriquez 2.
BRO J (84) – D. Enriquez 25, Urot 12, Patalita 11, Arreglo 10, Insong 8, Dela Peña 6, Flores 4, E. Noquillo 4, Arias 3, Ursal 2.