Bulldogs, 3 Coins nagsawo sa liderato sa Sunday.com

CEBU, Philippines — Temporaryong gisaw-an sa Bulldogs ug 3Coins ang liderato sa Sunday.com Season 6 Basketball Tournament niadtong Miyerkules diha sa Benedicto gym sa may dalan A.S. Fortuna sa Dakbayan sa Mandaue.

Kini human ang duha  Bulldogs ni playing team manager Tata Nadera mihambat sa New Bloods ni Neil Ibarita sa iskor nga 95-85 ug ang 3Coins ni Ray Neiz nakaipsot bitbit ang 76-73 nga kadaogan batok sa  Yamaha ni Alfred Pasana. 

Ang Bulldogs ug 3Coins parehong nagtangag og 2-0 nga baraha.

Mangtas kaayong nakaduwa si Dado Apa Jr. nga mikabkab og 25 puntos pangulohan ang balanseng opensa sa Bulldogs, kansang duwa wala gyud molubad gikan sa pagsugod hangtod sa katapusang gutlo.

Wala sab paperi si Jeric Gonzaga ug mikawhat kini og 22 puntos, ingon man si Jubos Bustamante nga miambit og 16 puntos sa Bulldogs.

Anugon kaayo ang 31 puntos ni Kevin Narca kay wala kini nasugamak  man ang New Bloods. Si Harold  Ebarle midonar og 17 puntos, samtang sila si Leonil Ibarita ug Jonas Ronolo nagkumboya'g 21 puntos sa napildeng New Bloods.

Sa laing bahin, sila si Hernan Omolon ug Jaypril Del Castillo parehong miantog og 18 puntos mangu sa scoring sa 3Coins human magtabla sa pagtapos sa first period, 19-all, miarangkada sa sunod nga kuwarter aron moposte og 40-29 nga bentaha sa halftime.

Misuway pag-ilog sa labaw ang Yamaha, apan bisan gisundan nila og gukod wala gyud mosalir ang ilang mga paningkamot.

Si JC Entrampas mitampo og 11 puntos sa 3Coins.

Nangulo sa napildeng Yamaha mao si Harlie Vergacer nga miratsada og 23 puntos, gisundan ni RR Paspie sa iyang 16 puntos.

Ang Yamaha aduna na sa'y 1-1 nga baraha ning tinuig nga liga nga gipasiugdahan sa Sunday.com ubos sa paningkamot sa presidente niining si Tata Nadera ubos sa bendisyon  sa consultant nilang si Atty. Sally Malig-on.

Ang  liga  gipaluyohan ni Mandaue City Mayor Jonas C. Cortes, Congressman Lolypop Ouano-Dizon, Board Member Jonkie Ouano, Alex Malakooti, Mr. & Mrs. Naig, Wendell Suico ug Tata Nadera.

PUNTOS MATAG USA

Unang duwa:

BULLDOGS (95) – Apa Jr. 25, J. Gonzaga 22, J. Bustamante 16, T. Cabahug 9, M. Abrinica 7, C. Ygot 5, Bacus 4, T. 

Grafe 3, Apa Sr. 2, Cabillo 2.

NEW BLOODS (85) – Narca 31, Ebarle 17, Ibarita 11, Ronolo 10, Gabunada 5, Mendez 5, Rendon 3, Maisling 3.

Ikaduhang duwa:

3 COINS (76) – Omolon 18, J. Del Castillo 18, Entrampas 11, Soriso 7, Manatad 6, Zambo 6, Rapayla 4, Lapinid 2, 

Niez 2, Malakooti 2.

YAMAHA (73) – Vergacer 23, Paspie 16, Soco 7, Pasana 7, Tirado 5, Cuer 5, Biosano 4, Ramirez 4, Espinosa 2.