CEBU, Philippines – Aduna na'y 24 ka teams ang kompirmadong mosalmot sa 1st Dayon Basketball League (DBL) nga gikatakdang sugdan sa Pebrero 1 diha sa Sambag 1 gym sa Tangkongan, Barangay Sambag 1 sa Dakbayan sa Sugbo.
Matud pa ni league organizer Allan Glen Abella, kinsa usa sab ka konsehal sa Sambag 1, nga ang makaduwa kadto lang mga players nga adunay gitas-on nga 5-foot-11 paubos.
Aron patas sab ang kompetisyon, gidid-an nila ang pagpaduwa og varsity ug ex-varsity sa high school or collegiate, ingon man commercial players.
Dugang pa ni Abella nga gidid-an sab nila sa pagpaduwa ang manalayay nga mga players.
Ang DBL Season 1 adunay duha ka kategoriya, ang 18-above ug 38-above.
Ang mga koponan nga moapil mao ang Chicken Proven, Karahus, Vipers, Alfa, Bobcats, Tso & Co., Jas Burger, SB Ballers, Arjud Shawn, Bulldogs, Niño Gen. Merchandise ug Harry's Lechon.
Ang top 2 sa matag bracket moabante sa crossover semis diin ang modaog maoy mag-abot sa finals.
Ang liga nga duwaon matag Sabado ug Domingo, gipaluyohan sa Sisig Teriyaki, Dayon Ent. & Printing Press ug Cebu's Tasty Lechon.
Niadtong gustong moapil, kontaka lang si Allan Abella sa 0923-5213702.