CEBU, Philippines — Ang Oklahoma City Thunder ug ang New Orleans Pelicans parehong nakabihag og higanteng mga kontra.
Didto sa Toronto, si Shai Gilgeous-Alexander mitabla sa iyang career-high nga 32 puntos, samtang si Chris Paul midugang og 25 puntos, 11 ka rebounds ug walo ka assists sa dihang gipukan sa Thunder ang defending champion Raptors, 98-97 alang sa ikaunom nilang daog sa miaging pito ka duwa.
Wala sab magpabitin sila Nerlens Noel ug Darius Bazley nga nagkumbinar og 24 puntos alang sa Thunder nga milansang sa ikalima nilang sagunson nga daog didto sa Toronto.
Sila si Kyle Lowry ug Fred VanVleet parehong mitali og 20 puntos, samtang si Serge Ibaka adunay 12 puntos ug 14 ka rebounds alang sa Raptors nga napilde sa ikatulong higayon sa miagi nilang upat ka duwa.
Didto sa New Orleans, si Lonzo Ball miburak og pito ka tres sa iyang season-high 27 puntos sa dihang giugbok sa Pelicans ang Houston Rockets, 127-112.
Si Brandon Ingram mitapos uban ang 27 puntos, samtang sila si Jrue Holiday ug E'Twaun Moore mitimbre'g 25 puntos matag usa alang sa Pelicans nga nakasagunson og upat na ka daog.
Napiangan hinuon ang Rockets kay miduwa nga wala ang tulo nila ka alas nga sila si James Harden, Russell Westbrook ug Clint Capela nga pulos dunay gihambin nga injury.