CEBU, Philippines — Miangkon ang Cebuana long-distance runner nga si Mary Joy Tabal nga dismayado siya sa resulta sa iyang kampaniya sa 2019 Southeast Asian Games diin giangkon niya ang silver medal niadtong Biyernes.
Ang 30-anyos nga si Tabal, kinsa napuhalan sa di kaayo ilado nga laing Pinay marathoner nga si Christine Hallasgo, nagkanayon nga bati ang iyang kondisyon atol sa dagan rason usab nga nakuyapan siya pag-abot sa finish line.
Hinuon bisan pa niini, si Tabal pabiling positibo paingun sa iyang damgo nga subling makadagan sa Olympics sunod tuig didto sa Tokyo, Japan.
Si Tabal nagkanayon nga mubalik dayon sa ensayo.
Laraw sa Olympian nga mopakusug sa iyang kampaniya sunod tuig ug sunod niya nga lumba mao ang Milo National Marathon sa Enero diin siya ang defending champion.
Gipuntirya usab niya mao ang makasalmot ug madakog sa Tokyo marathon sa Marso sunod tuig.
“No rest for me,” matud ni Tabal sa Spin.ph “I’m trying to defend my title in the Milo Marathon. Then Tokyo marathon next March.”
Giklaro ni Tabal nga wala siyay gipamati ug wala siyay injury bisan pa og nahagsa siya unahan sa finish line atol sa SEAG marathon.