CEBU, Philippines — Ang Cebuana gymnasts nga si Daniela Reggie Dela Pisa mipugnit og bulawan sa hoops category sa rhythmic gymnastics event sa 30th Southeast Asian Games kagahapon didto sa Rizal Memorial Coliseum.
Si Dela Pisa, 16-anyos ug produkto sa University of the Visayas (UV) nga bata pa nga miapil og regional tournaments sud ug gawas sa Sugbo maoy unang SEAG gold medalist sa nasud sa kasaysayan sa gymnastics.
Si Dela Pisa miiskor og 17.750 ug layo ra kaayo ang nagsunod niya nga si Izaah Amnan sa Malaysia nga adunay 16.500 alang sa silver medal. Nagsunod si Amy Kwan sa Malaysia nga adunay 15.900 alang sa bronze.
Daan nang gitan-aw si Dela Pisa nga medal prospect sa SEA Games.
Naka-bronze sab si Dela Pisa sa ball ug clubs categories sa maong kompetisyon.
Sa wala pa ang SEA Games, si Dela Pisa midaog og silver medal sa 2019 Singapore Open ug nakakuha og gold sa 3rd Royal Open sa Greece.