CEBU, Philippines – Nakahimo na og 13 ka sunod-sunod nga daog ang Milwaukee Bucks dihang ilang gidismantol ang Detroit Pistons, 127-103 sa duwa nila sa NBA kagahapon.
Si Giannis Antetokounmpo mibahog og 35 puntos uban ang siyam ka assists ug unom ka rebounds sa Bucks nga Bucks nakigsawo na karon sa liderato uban sa Los Angeles Lakers bitbit ang managsamang 19-3 nga baraha. Ang Lakers miposte sa ika-19 nilang daog human gilumsan ang Utah Jazz sa iskor nga 121-96 didto sa Salt Lake City.
Dominado kaayo ang duwa sa Bucks nga wala na molingi pa sukad gilat-an og 20 puntos ang Jazz human sa tulo ka kuwarter.
Si Khris Middleton miamot og 17 puntos, samtang si Eric Bledsoe mitampo'g 15 puntos alang sa Bucks.
Nangu sa Pistons mao si Andre Drummond uban ang 23 puntos, 14 ka rebounds ug lima ka assists.
Diriyot miulbo ang kagubot sa tunga-tungang bahin sa ikaduhang kuwarter human gisiko ni Blake Griffin ang nawong ni Antetokounmpo.
Lain na sab nga gubot ang nahitabo sa nahibilin nga usa ka minuto sa ikatulong kuwarter dihang gilakangan ni Griffin ang mga paa ni Antetokounmpo. Napakalma ra hinuon sa mga opisyal ang sitwasyon.
Sa laing duwa, si Anthony Davis maoy bida sa Lakers uban ang 26 puntos, unom ka assists, lima ka rebounds ug tulo ka blocks.
Si LeBron James miamot og 20 puntos ug 12 ka assists sa Lakers nga sa usa ka higayon naglabaw og 25 puntos sa second half.