Santa Fe nanghawod cluster 5 sa GUV Cup

CEBU, Philippines —  Ang Santa Fe madasigon nga mibangon human nahisukamod sa unang set dayon na ngadto sa pagpatikalbong sa Tabogon sa kulbahinam nilang kampiyonato aron sakmiton ang titulo sa cluster 5 sa Governor Gwen Garcia University Volleyball (GUV) Cup niadtong weekend didto sa Lamberto Ty Sports Complex sa lungsod sa Daanbantayan amihanang bahin sa Sugbu.

Giablihan sa Santa Fe ang ilang kampanya pinaagi sa pagpakaging sa Madridejos, 25-13, 25-20 ug ila kining gisundan og 25-9, 25-18 nga paglampaso sa Bantayan.

Ang Madridejos mikuyog sa Santa Fe ngadto sa crossover semifinals human gitagak ang Bantayan, 25-20, 25-22.

Sa pikas aksiyon, ang Tabogon miposte og duha ka sagunson nga daog batok sa Daanbantayan, 25-12, 25-19, ug San Remigio, 25-4, 25-18. Ang host Daanbantayan mi-abante ngadto sa Final 4 human gipalagpot ang San Remigio, 25-15, 25-15.

Sa semis, ang Santa Fe mipabakwit sa Daanbantayan, 25-18, 25-23 samtang ang Tabogon mipasibat sa Madridejos, 25-19, 25-21.

Sa ilang final match, nahagba ang Santa Fe sa unang set, 20-25, apan milusad kini og mainit nga resbak aron pakgangon ang Tabogon sa sunod nga duha ka sets, 25-20, 25-23.

Bisan pa man sa ilang kapildihan, ang Tabogon morepresentar gihapon sa cluster 5 uban ang Santa Fe sa quarterfinal round ning torneyo nga giorganisa sa Cebu Volleyball Association (CEVA) sunod bulan sa wa pa hisayring binyu.