CEBU, Philippines — Giangkon ni All-Star Draymond Green nga lisud idaog sa mga nagsingabot nilang mga duwa nga wala ang ilang superstar nga si Stephen Curry tungod kay gioperahan ang kamot niini.
Si Curry mopahuway og tulo ka bulan human mabuak iyang kamot atol sa ilang duwa batok Phoenix Suns dihang natagak kini ug nadat-ogan siya ni Suns center nga si Aaron Baynes.
Ang Warriors nabutang karon sa dili pamilyar nga sitwasyon tungod kay anaa sila sa ika-14 nga dapit sa Western Conference sa rekord nga 1-5.
Si Green mao na lang ang nahibiling sinaligan sa Warriors uban ang bag-ong teammate nga si D'Angelo Russell. Walay kasegurohan kon ipugos ba og duwa sa Warriors si Klay Thompson nga padayon pa nga nagpaalim sa injury sa tuhod.
Ang Warriors mag-atubang og laing lisud nga tahas sa Huwebes sa ilang pakigsangka sa Houston Rockets nga gibidahan nila ni James Harden ug Russell Westbrook.