CEBU, Philippines — Kung siya ang pabut-on, gusto ni Hall-of-Famer trainer Freddie Roach ang kanhi champion nga si Danny Garcia nga maoy isunod sa iyang batos nga si WBA welterweight champ Manny Pacquiao.
Si Roach mitug-an nga wala siyay ideya sa kung kanus-a mubalik og away ang Pinoy boxing icon, apan nakadungog siya nga sa Abril o Marso sunod tuig gusto sa Philippine Senator nga mubalik sa ring.
“I don’t know when Manny’s next fight will be,” matud ni Roach sa The Philippine STAR. “I’m just waiting for a call. I don’t pick Manny’s opponents. That decision is entirely up to Manny. I heard Manny wants to fight in March or April."
Si Roach miingon nga gusto niya si Garcia tungod kay sikat kini nga boksidor ug makahatag kini og nindot nga sangka sa eight-division world champion.
Una nang gi-anunsiyo sa opisyal sa MP Promotions nga si Sean Gibbons nga anaa nila ni Danny ug Mikey Garcia ang gipilian nga isunod iparang ni Pacquiao, apan walay interes si Roach ni Mikey Garcia kinsa dili kaayo sikat.
“Danny’s a better fighter,” matud pa niya.. “Besides, Mikey’s coming off a loss to (Errol) Spence. If Mikey wants to face Manny, he should do another fight first, get a win then challenge Manny."
Imposible na usab nga makasangka ni Pacquiao si welterweight star Errol Spence sa sayung bahin sunod tuig tungod usab sa giatubang nga kaso sa American boxer kinsa nadasmag human nagmaneho nga hubog.