CEBU, Philippines — Gibaraw sa Miami Heat ang home opener sa Milwaukee apan nanginahanglan usa sila og dugang singko minutos sa wala pa pakganga ang Bucks, 131-126, sa NBA kagahapon didto sa Fiserv Forum sa Milwaukee, Wisconsin.
Si Goran Dragic mikadlit og 25 puntos ug si Bam Adebayo midugang og 19 puntos alang sa Heat nga nagmilagro human malubong og 21 puntos sa ikatulong kuwarter aron patikyaobon si Giannis Antetokounmpo ug ang Bucks.
Si Antetokounmpo mitapos uban ang 29 puntos, 17 ka rebounds ug siyam ka assists apang ang reigning MVP duna say walo ka turnovers ug na-fouled out sa nahibilin nga 2:31 sa overtime.
Human sila gilat-an sa iskor nga 74-53 sa nakaon nga usa ka minuto pa lamang sa ikatulong kuwarter, nagmangtas ang Heat hinungdan nga ilang gibayo ang Bucks, 78-52, sa nahibiling bahin sa duwa.
Nagparamdam sab si Kendrick Nunn nga mikimada og 18 puntos alang sa Heat nga dunay pito ka players nga mirehistro og double figures apil na ang taga-Milwaukee niining rookie nga si Tyler Herro nga mitapos uban ang 14 puntos.
Bugtong miabag ni Antetokounmpo mao si Khris Middleton nga miposte og 25 puntos.