Clippers mipilde sa Lakers
CEBU, Philippines —Naglampuson si Kawhi Leonard sa iyang 'debut' sa Los Angeles dihang mipabuto siya og 30 puntos aron pangulohan ang Clippers ngadto sa 112-102 nga kadaogan batok ni LeBron James ug Los Angeles Lakers pagsugod sa 2019-2020 NBA season kagahapon didto sa Staples Center.
Si Leonard mihimo dayon og impresyon sa bag-o niyang koponan human niya hatagi ang Toronto Raptors sa labing una niining kampiyonato sa NBA sa miaging season.
"It was great. A lot of emotions, game one," matud pa ni Leonard nga nagdako sa Riverside, mga 50 ka milya ang gilay-on sa sidlakang bahin sa LA. . "I am just happy we came out and got a victory. We had great practices and had some carry over from that tonight."
Si Leonard milangkat sab og unom ka rebounds ug lima ka assists. Naka-angkon siya og igong suporta gikan nilang Lou Williams ug Montrezl Harrell nga nagkumbinar og 38 puntos.
Gawas sa agresibo nilang opensa, solido sab ang depensa sa Clippers hinungdan nga ilang na-angklahan si James ug ang bag-o niining sidekick nga si Anthony Davis.
Si James mitapos uban ang 18 puntos, apan mipasud lamang og pito sa 19 niya ka itsa, samtang si Davis mikamada og 25 puntos, apan nasipyat og 13 sa 21 niya ka tira.
Mangtas kaayo ang bench players sa Clippers hinungdan nga ilang gilabhan ang Lakers, 60-19.
Ang makalisang kay gibihag sa Clippers ang Lakers bisan og wala pa makaduwa ang injured nga si Paul George nga ilang nabira gikan sa Oklahoma City Thunder.
- Latest
