CEBU, Philippines — Pahugtan pa sa TNT KaTropa ang pagkupot nila sa liderato sa PBA Governors' Cup sa dihang ilang banggaon ang Columbian Dyip karong adlawa sa Ynares Center.
Ang duwa sugdan sa alas-6:45 sa gabii human sa engkuwentro tali sa Blackwater Elite ug NorthPort Batang Pier nga sugdan sa alas-4:30 sa hapon.
Ang KaTropa nga tinguhang mosakmit sa ilang ikaupat nga sunod-sunod nga daog, bidahan ni kanhi NBA standout KJ McDaniels.
Sama sa ilang gibuhat sa miaging Commissioner's Cup, ang TNT dominante sa ilang mga duwa, apan si coach Bong Ravena gusto nga mas andam sila itandi sa miaging conference.
Si Ravena dako og salig ni McDaniels, kinsa niduwa kaniadto sa Houston Rockets uban ni James Harden.
Dili hinuon mokompiyansa si Ravena batok sa Dyip nga bag-o pang nidaog batok sa NorthPort niadtong Miyerkules.