CEBU, Philippines – Ang defending champion David Justin mipahayag sa ilang kampanya nga mapanalipdan ang ilang korona human gipakaging ang Amicis, 84-75 aron pagpabiling wa'y pilde sa open category sa 10th Mayor Alegado Cup Inter-Barangay Fiesta Basketball League didto sa Consolacion.
Si Chris Yonnel Perolino maoy nangu sa lima ka players nga mikadlit og double figures uban ang 16 puntos sa dihang ang David Justin ni team owner Dennis Maglasang mipahugot sa ilang pagkupot sa liderato bitbit ang perpektong 3-0 record.
Si Rexon Moneva mitapos uban ang 15 puntos, sila si Erwin Brigole ug Joseph Cabahug miiskor og 14 matag usa, samtang si Filvenson Collanggo miamot og 10 puntos alang sa David Justin nga mipakita og nindot nga duwa sa final half aron patiurokon ang Amicis.
Si Lemar Dahil mipabuto og 28 puntos, apan nakawang ang iyang paningkamot gumikan kay ang Amicis nakatilaw sa una niining pilde sud sa duha ka duwa.
Sa inter-barangay, sila si Leanmark Rivera ug Juriemale Isok nagkumbinar og 27 puntos sa dihang gipalagpot sa Tolotolo ang Lanipga, 71-52, samtang sila si Joshua Alilin, Clyde Alilin ug Arjay Alilin nagkumboya'g 49 puntos sa dihang gipasibat sa Sacsac ang Panas, 70-48 sa midgets category B.
Sa lain pang tagakay nga mga duwa, sila si Kevinson Labapez ug Melvin Fernandez miposte og 14 puntos matag usa sa dihang gitagak sa Polog ang Lanipga, 58-54, samtang si Dhil Pitogo dunay 21 puntos ug si Kerfie Villamor mirehistro og 18 puntos sa dihang gipalayas sa Panas ang Tilhaong, 84-71 sa SK juniors category B.
Wala sab magpaalkansi si Gervy Ponce nga mipabuto og 30 puntos alang sa Tolotolo nga mipapauli sa Panoypoy, 79-64, samtang ang Pulpogan mitagak sa Danglag, 79-74 sa seniors category B.