CEBU, Philippines — Nakasagunson og duha ka daog ang Thor Customs Brokerage aron temporaryong magsolo sa liderato sa GJA-Doggy Cup Basketball Season 3.
Gipukan sa Thor ni Eric Lima ang Rascals ni Resty Lope, 63-54 niadtong Sabado didto sa Cebu Port Authority (CPA) gym sa north reclamation area.
Si Ronald Dungog maoy nangu sa tulo ka Thor players nga miiskor og double figures pinaagi sa iyang 18 puntos, gisundan ni Jopel Paca nga adunay 11 puntos ug Reyden Villaronza sa iyang 10 puntos.
Nagkumboya'g 26 puntos sila Niki Pimentel ug Takloy Moral aron sab pangulohan ang pilderong Rascals nga aduna na'y 1-1 win-loss record.
Nagbitbit sab og 1-1 nga baraha ang Cutarra Customs Brokerage dihang ilang gipahamtangan og laing kapildihan ang MJE sa iskor nga 68-62.
Ang defending champion Cutarra ni playing team owner Rocel Cutarra gipangulohan ni Dondon Ecojedo nga mibagnos og 24 puntos.
Nakatampo sab og dako si Francis Eri nga mipugnit og 15 puntos ug ingon man si Mark Santiago nga miambit og 10 puntos.
Ang MJE ni MJ Engracial nga mao na lang ang bugtong koponan nga wala pa makatilaw og daog sa duha ka duwa, gipangulohan ni Noel Medalle nga mipaksit og 16 puntos, samtang si Dandan Enriquez mipugnit og 15 puntos.
Nakabangon sab ang Quickserver human masugamak sa una nilang duwa dihang ilang gipahimungtan ang Rongcales Customs Brokerage, 71-58.
Mipakitang gilas si Rex Bensi diin miburak kini og 28 puntos aron mangu sa scoring sa Quickserver.
Mikawat sab og salida si Jomar Caynila nga mitimbre'g 13 puntos. Ang playing coach nga si Bruce 'The Captain' Inopiquez ug Jeff Garcia mitampo'g 10 puntos matag usa sa Quickserver nga maoy midiktar sa duwa.
Si Paul John Oswa mao sab ang nangu sa Rongcales nga mihakot og 17 puntos, gisundan nilang Baeng Medalle ug Daculan nga parehong mikabya'g 15 puntos.
Ang Quickserver ni Eulo Arevalo ug Rongcales ni Richard Rongcales parehong nagbitbit og 1-1 nga baraha ning maong liga nga ubos sa superbisyon nilang commissioners Mark Gornez, Noel Medalle ug Arden Earl Valenzuela.
PUNTOS MATAG USA
Unang duwa:
CUTARRA (68) – Ecojedo 24, Eri 15, Santiago 10, Manulat 7, Amorin 7, Cutarra 2.
MJE (62) – N. Medalle 16, E. Enriquez 15, Alejano 8, Oyao 4, Aragon 4, Alinsug 3, Baltonado 3, Robinson 2, Engracial 2, Marata 2.
Ikaduhang duwa:
QUICKSERVER (71) – Bensi 28, Caynila 13, Inopiguez 10, Garcia 10, Valenzuela 7, Cal 7, Jojie 1.
RONGCALES (58) – Oswa 17, B. Medalle 15, Daculan 15, Camay 4, Rongcales 4, Dela Cruz 3, Velarde 2, Tero 1.
Ikatulong duwa:
THOR (63) – Dungog 18, Paca 11, Villaronza 10, Jerungin 8, Manlosa 6, Aguilon 3, Felarudo 2, Diamada 2.
RASCALS (54) – Pimentel 14, Moral 12, Jobadz 7, Intes 6, Mabangue 6, Remonde 4, Monteño 3, Diaz 2.