CEBU, Philippines — Gawas ni Dwight Howard, gipuntariya sab nga kuhaon sa Los Angeles Lakers si Joakim Noah.
Kini kabahin sa tinguha sa Lakers nga madungagan ang ilang puwersa ug matapakan ang haw-ang nga gibilin ni DeMarcus Cousins, kinsa dili na makaduwa pa sa sunod nga NBA season tungod kay nakaangkon kini og ACL injury sa tuhod atol sa practice.
Lain pang gisaytan sa Lakers mao si Marreese Speights, segun sa taho sa Los Angeles Times.
Nindot ang gipakitang salida sa 34-anyos nga si Noah uban sa Memphis Grizzlies sa miaging season human siya gibuhian sa New York Knicks.
Sud sa 42 ka duwa sa Memphis, mi-average siya og 7.1 points, 5.7 rebounds ug 2.1 assists matag duwa.
Ang 6-foot-11 nga si Noah usa ka kanhi Defensive Player of the Year ug two-time All-Star.
Samtang si Howard gihamok og injury. Nakasilbe lamang siya og siyam ka duwa sa Washington Wizards nga mi-trade sab dayon niya sa Grizzlies.
Sa kasamtangan, si Howard dunay kontrata sa Grizzlies, apan lagmit dili siya iapil sa line-up niini sa umaabot nga NBA season.