Pacquiao gibaharan ni Porter

CEBU, Philippines — Taas ang kompiyansa ni WBC welterweight champion Shawn Porter nga siya ang boksidor nga moparetiro ni WBA welterweight king Manny Pacquiao kon ugaling siya man ang mapilian nga sunod ikasangka sa Pinoy'ng boksidor.

Si Porter nga personal nga misaksi sa 'split decision' nga kadaogan ni Pacquiao  batok ni  Keith Thurman sa miaging bulan didto sa MGM Grand sa Las Vegas, nagkanayon nga nasuhito na siya ni Pacquiao tungod kay nahimo siyang sparmate niini kaniadto.

Si Porter makigsangka ni IBF champion  Errol Spence sa Septiyembre 28 ug dako iyang pagtuo nga mapugos pag-atubang si Pacquiao  kaniya alang sa usa  ka  unification bout.

Gitataw hinuon ni Porter  nga bilib siya sa gipakita nga kaiglas gihapon ni Pacquiao bisan  nag-edad  na kini og 40-anyos.

Nasayran, nga si Porter usa sa mga boksidor nga gitan-aw sa Team Pacquiao nga maayong iparang sa Pinoy champ uban nila ni Mikey Garcia ug Danny Garcia.