CEBU, Philippines — Ang Southwestern University (SWU)-Phinma Cobras ug ang Joemang's Surplus-University of Cebu (UC) Webmasters magsangka sa krusyal nga duwa karong adlawa sa 2019 Cebu Schools Athletic Foundation, Inc. (CESAFI) Partner's Cup diha sa Cebu Coliseum.
Kini gumikan kay sikit kaayong gikumbatihan sa Cobras ug Webmasters ang No. 2 spot nga magkupot og twice-to-beat advantage sa semifinals.
Sa kasamtangan, ang Cobras nagsolo sa ikaduhang dapit sa liderato sa seniors division bitbit ng 8-2 win-loss record, apan duol kaayong naggukod kanila ang Webmasters uban ang 7-3 nga marka.
Mao kini ang nakadugang og lamas sa ilang engkuwentro sa alas-7 sa gabii ilabi na kay duna pa sila'y tagsa ka duwa nga pulos batok sa wa'y pildeng haring gangis nga ARQ Builders-University of the Visayas (UV) Green Lancers.
Sa pasiunang duwa sa alas-5:30 sa hapon, ang Cebu Landmasters-University of San Carlos (USC) Warriors mosuway og pahayag sa ilang kampanya nga makasud sa Final Four sa dihang ilang harungon ang University of San Jose-Recoletos (USJ-R) Jaguars.
Ang Warriors anaa karon sa ikaupat nga dapit bitbit ang 4-6 nga baraha, samtang ang Jaguars nagbarog sa ikaunom uban ang tulo ka daog nga giatbangan og walo ka pilde. Gipatung-an sila sa University of Southern Philippines Foundation (USPF) Panthers nga dunay 3-7 record. (BANAT NEWS)