Harden di moduwa sa World Cup
CEBU, Philippines — Si Houston Rockets star James Harden dili moduwa sa Team USA sa FIBA World Cup sunod bulan didto sa China.
Mao kini ang gibuak nga balita sa Houston Chronicle kagahapon.
Matud pa ni Harden nga gusto niyang igahin ang iyang panahon sa nahibiling bahin sa off-season sa pagpangandam uban sa Rockets.
Seguradong mausab ang sistema ug plastada sa Rockets human ilang nakuha si Russell Westbrook gikan sa Oklahoma City Thunder pinaagi sa usa ka trade hulip ni Chris Paul.
Ang desisyon ni Harden miabot pipila lamang ka adlaw human sila si Anthony Davis sa Los Angeles Lakers ug Ben Simmons sa Philadelphia 76ers mipadayag nga dili sila moduwa sa US team ubos ni coach Gregg Popovich sa prestihiyosong world basketball championship.
Duna pa hinuo'y laing players ang Houston nga moserbisyo sa US team nga mopahigayon og training camp karong Agosto 5-9 didto sa Las Vegas sa dili pa sila moduwa sa World Cup nga sugdan karong Agosto 31 sa China.
Kini mao sila si Eric Gordon ug P.J. Tucker.
- Latest