CEBU, Philippines – Milahutay ang Jam Customs Brokerage sa ligas kaayo nila nga duwa batok sa Robbie Trading, 98-96 sa Cebu Aduana Basketball Legends (CABL) Season 1 niadtong Sabado didto sa Basak gym, Dakbayan sa Sugbo.
Gipangulohan ni Alfred Jovita ang Jam Customs Brokerage nga mihakot og 23 puntos. Ikaduhang topscorer sa team ni Primitivo Mondin mao si Erlito Avenido nga mikolekta og 19 puntos.
Si Baeng Medalle miamot og 18 puntos, samtang sila si Ronan Cañete ug Entero nagkumboya'g 26 puntos sa Jam Customs Brokerage nga miposte og 48-46 sa halftime.
Padayon nga sikit ang nahimong kulbahinam ang duwa dihang labaw lang og dos puntos ang Jam sa himalatyong segundos sa duwa. Gihatagan og higayon ang Robbie Trading, apan pakyas si Joseph Jayme pagbuhi sa iyang tira gikan sa 3-point area.
Ang Jam aduna na'y 3-3 nga baraha, samtang ang Robbie Trading usa pa lang ang daog batok sa lima ka pilde.
Si Jomar Caynila mipabuto og 28 puntos aron mangu sa upat ka Robbie Trading players nga miiskor og double figures. Si Gilbert Guirit miauno og 18 puntos, si Marlou Cañal miambit og 16 puntos ug si Joseph Jayme mitampo'g 14 puntos sa Robbie Trading ni Karl Zapanta.
Sa laing aksiyon, ang Canillas Customs Brokerage ni Roy Canillas nagpabiling lider human gipukan ang JDM Customs Brokerage ni Jonathan Matibag, 80-70.
Ang 6-0 nga Canillas gipangulohan nilang Rex Bensi ug James Gambe nga nagkumboya'g 29 puntos, samtang si Noel Medalle miamot og 12 puntos.
Si Dodong Manlosa mao lang ang nakaiskor og double figures sa 2-4 nga JDM Customs Brokerage pinaagi sa iyang 11 puntos.
Midaog na sab ang Petracorta Customs Brokerage dihang ilang gipilde ang OPASCOR, 74-69.
Mibagnos og 20 puntos si Reyden Villaronza aron mangu sa scoring sa Petracorta nga aduna na'y 4-1 record.
Sila si Francis Palero ug Toni Largosa nagkumbinar og 30 puntos sa team ni Mayor Melchor Petracorta.
Ang Opascor gipangulohan sab ni Arden Valenzuela nga mibahog og 20 puntos, gisundan ni Paul John Oswa sa iyang 13 puntos. Sila si Digoy Solidarios ug Emy Gaviola nagtampohay og 11 ug 10 puntos sa Opascor ni Digoy Solidarios nga nagbitbit og 3-4 nga baraha.
PUNTOS MATAG USA
Unang duwa:
PETRACORTA (74) – Villaronza 20, Palero 18, Largosa 12, Petracorta 6, Nadal 4, Agustinez 4, J. Petracorta 4, Villacastin 4, Sagarino 2.
OPASCOR (69) – Valenzuela 20, Oswa 13, Solidarios 11, Gaviola 10, Piape 6, Pastor 6, Garcia 2, Abesia 1.
Ikaduhang duwa:
JAM (98) – Jovita 23, Avenido 19, B. Medalle 18, Entero 14, Cañete 12, Taladua 5, Monares 4.
ROBBIE (96) – Caynila 28, Guirit 18, Cañal 16, Jayme 14, Villarias 4.
Ikatulong duwa:
CANILLAS (80) – Bensi 15, Gambe 14, N. Medalle 12, Sigue 8, Dela Cerna 8, Sillar 8, Zabate 6, Marata 4, Boniao 2, Belarmino 1.
JDM (70) – Manlosa 11, Ibo 8, Jamolin 6, Badon 5, Sepe 5, Valle 3, Palad 2, Velez 1.