Players, coaches sa UC ug USPF gipangsilotan
CEBU, Philippines – Ang Cebu Schools Athletic Foundation, Inc. (CESAFI) pinaagi sa Commissioner's Office niini misuspenso sa duha ka players sa University of Southern Philippines Foundation Baby Panthers ug University of Cebu Junior Webmasters ug ingon man ang mga assistant coaches sa duha ka teams gumikan sa ilang partisipasyon sa nahitabong kagubot atol sa duwa tali sa UC ug USPF sa 2019 CESAFI Partner's Cup niadtong Huwebes sa gabii didto sa University of San Carlos-Main gym.
"The four involved in the incident and the other one for unsportsmanlike conduct are all suspended with sanctions," matud pa ni CESAFI commissioner Felix 'Boy' O. Tiukinhoy Jr.
Gawas sa usa ka duwa nga suspensiyon, sila si Eldebrando Sevillejo sa UC, Elijah Singson sa USPF ug assistant coaches Gary Hortelano sa Junior Webmasters ug Christian Bacus sa Baby Panthers gipamulta sab og P5,000 matag usa ug kinahanglan nga mohimo og tulo ka oras nga community service sa dili pa sila tugotan nga makabalik sa tagsa-tagsa nila ka mga koponan.
Si Kyle Ochavo sa USPF awtomatik nga gipahamtangan og susamang silot gumikan kay siya na-ejected human matawgi og 'unsportmanlike' foul ug technical foul sa katapusang 2:34 sa aksiyon.
Human ma-ejected si Ochavo, miulbo ang tensiyon human nagkasungi sila si Sevillejo ug Singson duol sa midcourt sa nahibilin nga 20 minutos sa duwa.
Ang mga coaches sa duha ka kampo miapil sa kasamok, apan nakontrolar ang sitwasyon hinungdan nga wala kini modako.
Gumikan sa ilang gibuhat, sila si Sevillejo ug Singson na-ejected ingon man sila si assistant coaches Hortelano ug Bacus nga miresulta sa ilang suspensiyon.
Ang UC maoy midaog sa duwa, 75-60 ug nakigsawo na sila karon sa liderato sa juniors division uban sa ARQ Builders-University of the Visayas (UV) Baby Lancers bitbit ang 3-0 nga baraha.
- Latest
