Leonard hilom pa kabahin sa iyang ugma

CEBU, Philippines – Labas pang migiya sa Toronto Raptors ngadto sa labing una nilang NBA title, nagpabiling tak-om si Kawhi Leonard kabahin kon unsay ugma nga nagpaabot kaniya.

Sa pagka karon, ang two-time NBA champion ug Finals MVP wala pa mipahibalo kon mobiya ba siya o magpabilin sa Toronto.

Usa ka three-time All-Star ug two-time NBA Defensive Player of the Year, si Leonard gipaabot nga mobalibad sa player option sa katapusan niyang tuig ug mamahimong usa ka free agent karong Hunyo 30.

Hinuon, ang Raptors makatanyag kaniya og lima ka tuig nga kontrata nga mobalor og $190 million.

Apan ning higayona, si Leonard nagkanayon nga bugtong anaa sa iyang huna-huna mao ang pagdimdim sa katam-is nga kampiyonato nga ilang naangkon.

"I'm enjoying this" matud pa ni Leonard. "It's not time to stress, it's still time to have some fun. I've just been enjoying my experience."

Gipaneguro hinuon ni Leonard nga iya rang ipahibalo kon unsa man gani ang iyang desisyon sa tukmang panahon.

"I'm going to take the right time," dugang pa ni Leonard. "You don't need too many days to figure it out. We'll see what happens. Once that time comes, then we'll all lay the pros and cons out."

Human gibuntog ang two-time defending champion Golden State Warriors sa bag-o lang natapos nga NBA Finals, ang Raptors mikulit og kasaysayan isip labing unang team gawas sa Amerika nga nakampiyon sa liga. Mao sab kadto ang labing una nilang korona sukad nahimugso ang ilang prangkisa 24 ka tuig na ang milabay.