CEBU, Philippines — Tulo ka Sugboanong long-distance runners ang mosuway paghatag og dungog sa Pilipinas sa ilang pagsalmot sa 14th Laguna Phuket Marathon 2019 didto sa Thailand.
Sila mao si Prince Joey Lee, Azlan Pagay ug Ruffa Sorongon. Ang tulo kabahin sa Team 7-Eleven Philippines.
Libre ang pagsalmot sa tulo isip kabahin sa ilang nadag-an sa miaging 7-Eleven Run series niadtong Pebrero.
Si Lee modagan sa 21K category, samtang sila si Pagay ug Sorongon manimpad sa 42K full marathon. Ang tulo magsagubang og lisud nga tahas tungod kay ikalumba nila ang mga banggiitang runners gikan sa nagkadaiyang dapit sa Asya.