CEBU, Philippines — Human sa iyang impresibong PBA debut niadtong Domingo uban sa Blackwater Elite, ang No. 2 pick ug Fil-American sensation nga si Ray Parks Jr. miangkon nga ang sangka batok sa crowd-darling Barangay Ginebra Kings maoy iyang gikahinaman nga mahitabo.
Si Parks nga mirehistro og 20 puntos ug milangkat og walo ka rebounds sa una niyang duwa sa PBA aron hatagan ang Blackwater og 94-91 nga kadaogan batok sa Meralco Bolts.
Ang two-time ABL MVP nagkanayon nga karon nga anaa na siya sa PBA, gusto niya nga masinati kun unsa ang makigduwa batok sa Ginebra nga maoy labing sikat nga koponan sa liga. Si Parks mitug-an usab nga gusto niya nga masukod iyang abilidad batok sa lig-ong koponan sama sa Ginebra.
Giapas usab ni Parks nga makaduwa ang kanhi niya teammate sa Alab Pilipinas ug import sa Ginebra nga si Justin Brownlee.
Ang gihandum ni Parks mahitabo karong Biyernes diin paningkamuton sa Blackwater nga makuha ang solong liderato pinaagi sa pagdaog. (BANAT NEWS)