Talisay, Tuburan 3-0 na sa Govenor Cup

CEBU, Philippines — Ang defending champion Talisay City Aquastars ug Tuburan wala mipakita og pagbahar bisan sa usa ka semanang pahuway human ilang gipakaging ang tagsa-tagsa nila ka mga kontra aron pagpabiling wa'y pilde sa quarterfinal round sa 2019 Cebu Govenor's Cup Inter-Cities and Municipalities Under 21 Developmental Basketball Tournament.

Nagsandig ang Talisay sa bagsik niining ataki sa sinugdanan aron patikalbungon ang Minglanilla Archangels, 91-78, samtang ang Tuburan milusad og nagkayong opensiba sa endgame aron paludhon ang Sogod, 90-81.

Gumikan niini, gisaw-an karon sa Talisay ug Tuburan ang liderato sa Bracket B bitbit ang parehong 3-0 records.

Si Kendrick Abarquez mitagak og 15 puntos, samtang sila si Keaton Clyde Taburnal ug Elmer Villabrille mitali og 14 puntos matag usa alang sa Talisay nga miposte og  31-10 nga labaw sa first period.

Misamot pa ang kainit sa Talisay sa ikaduhang kuwarter hinungdan nga ila pang gipaburot ang ilang labaw ngadto na sa makabungog nga 35 puntos sa halftime, 59-24. 

Wala na makaginhawa pa sukad niadto ang  Minglanilla hinungdan nga nasugamak sa  ikaduha niining pilde sud sa upat ka duwa.

Sa pikas bahin, sila si Joyce Lee Oropiano ug Romyr Kirt Gonzaga nagkumboya og 55 puntos alang sa Tuburan nga mipabuto og 30-15 nga bomba sa hinapos nga bahin sa duwa aron tumbahon ang Sogod.

Sa laing aksiyon sa Bracket B, gipaksit sa Alegria ang Tabuelan, 111-99 aron putlon ang duha ka sagunson niining pilde. Ang Tabuelan nahagba ngadto sa 1-3.

Sa Bracket A, ang Medellin Sweeteners mipilde sa Argao, 94-84, ang Balamban Shipbuilders mibihag sa Siempre Samboan, 77-65, samtang ang Danao City milubong sa Dumanjug, 96-70.

Ang Medellin ug Balamban kasamtangan karong nagsawo sa ikaduhang dapit uban ang 3-1 nga baraha sunod sa Mandaue City Balllers nga dunay 3-0 record.