Enriquez hari sa march edition sa CEPCA monthly
CEBU, Philippines — Si Rogelio Enriquez Jr. nakigtabla lamang ni Peterson Sia sa ikalima ug katapusang hugna, apan wala kini nahimong babag aron iyang dominahon ang March edition sa binulan nga torneyo sa Cebu Executives and Professionals Chess Association (CEPCA) niadtong Domingo diha sa Barracks Chess Club sa Robinsons Galleria Cebu.
Gihuman nilang Enriquez ug Sia ang kompetisyon bitbit ang managsamang 4.5 puntos, apan si Enriquez nga maoy head coach sa University of San Jose-Recoletos (USJ-R) chess varsity team, maoy mibira sa korona gumikan sa mas taas niining tie-breaker gamit ang Bucholz system.
Sa wala pa makigharong ni Sia, giharos og pilde ni Enriquez sila si Richard Ouano, Jervy Villarin, National Master Arnolito Cadiz ug Cristy Cabungcag.
Milugwa nga kampiyon si Enriquez bisa'g gihatagan lamang siya og tres minutos matag duwa isip usa ka Class A player.
Gawas nga mibulsa og P1,500, si Enriquez mokuyog sab nilang Vince de la Torre ug Amado Olea ngadto sa grand finals nga gibansagan og "Battle of Champions" karong Disyembre.
Sila si Fillemon Capuno ug Cristy Cabugcag maoy mipahiluna sa ikatulo ug ikaupat nga dapit uban ang 4.0 puntos, samtang si Arje Villarin maoy nagkumpleto sa top 5 uban ang 3.5 puntos.
- Latest
