CEBU, Philippines — Naglumpayat sa kalipay ang Monterroyo-Jordan dihang ilang napilde ang mas dagko nga Team Sebandal D' Councilor, 63-54 sa finals aron maangkon ang korona sa LABA Sinulog Cup 2019 niadtong Biyernes diha sa Co Tiao King gym sa Tabok, Dakbayan sa Mandaue.
Si Richard Jordan maoy topscorer sa Monterroyo-Jordan nga mipugnit og 12 puntos, gisundan nilang Tawing Grafe ug Michael Tañan nga mitampo'g 10 puntos matag usa.
Balanse kaayo ang opensa sa Monterroyo-Jordan nilang Dr. Raul Monterroyo ug Richard Jordan kay ang tanan nilang 13 ka players nakapuntos.
Ang Monterroyo-Jordan maoy naggukod sa nag-unang duha ka kuwarter. Molabaw man tuod sila, apan papason sab kini dayon sa Sebandal. Diha na nila makontrolar ang duwa human sila milabaw og 12 puntos sa sayong bahin sa fourth quarter, 49-37.
Naungot ang iskor sa Monterroyo-Jordan hinungdan nga nakasikit ang Sebandal, 49-46 sa tunga-tungang bahin sa fourth period, apan si Marlon Mendoza mipasud og duha ka free throws nga maoy miduslit sa nagdilaab nga rally sa Monterroyo-Jordan ug nakapawong sa paglaum sa Sebandal nga gipangulohan ni Adolfo nga mikamada og 14 puntos.
Sa pasiunang duwa, ang Casili mipilde sa Butch Surveying, 89-81 aron mopahiluna sa ikatulong puwesto.
Sila si Alexam Amaga ug Rex Gonzaga nagkumboya'g 43 aron mangu sa scoring sa Casili, samtang ang team manager nga si Nonoy Sajot miamot og 12 puntos.
Tulo sab ka players sa Butch Surveying ang miiskor og double figures sa pagpangu ni Ramie Suson nga mibugha og 19 puntos, gisundan nilang Geryl Bukiron ug Jong Cabunilas sa ilang 13 ug 11 puntos matag usa.
Ang liga nagmalampuson tungod sa pagtinabangay sa tanang miyembro sa LABA ubos sa liderato ni P/Capt. Dondon Coloscos sa abag nilang Wendell Oquias, Lloyd Chavez, Roy Ermac, Macmac Borja ug Nante Rayla ug ingon man nilang Anthony Bacolod, Benny dela Cruz, Adonis 'Kanikz' Dakay ug Ian Armero.
PUNTOS MATAG USA
Unang duwa:
CASILI (89) – Amaga 22, R. Gonzaga 21, Sajot 12, D. Aligway 9, Abadiano 7, Comendador 6, Aligway 6, Anoya 6.
BUTCH Surveying (81) – Suson 19, Bukiron 13, Cabunilas 11, Herbieto 7, Vios 6, Alfanta 6, Cabucos 5, Suico 5, Castillo 5, Mahusay 4, Tantuan 4, Panugaling 4.
Ikaduhang duwa:
MONTERROYO-JORDAN (63) – Jordan 12, Grafe 10, Tañan 10, Canjo 7, Armero 5, Monsanto 4, Yu 4, Mendoza 4, Monterroyo 3, BJ 2, Catinoy 2, Pelit 2, Delima 2.
SEBANDAL (54) – Adolfo 14, Sebandal 9, Ceniza 7, Capada 6, Bercero 6, Culob 6, Borga 2, Aparri 2, Asis 2, Rayla 2.