CEBU, Philippines — Seryoso gyud ang Alab Pilipinas nga sayung makuha ang luna sa playoffs sa ABL human sila mikulit og laing dominante nga kadaugan niadtong miaging adlaw didto sa Thailand.
Ang defending champion nga Alab milatos pag-usab sa karibal nga Mono Vampire-Thailand, 78-59, diin ilang gisakmit ilang ika-16 nga daog sa 19 ka duwa.
Wala pa gihapon kahatagi og solusyon sa ubang ABL teams ang gikahadlokang import tandem nila Renaldo Balkman ug PJ Ramos nga subling mipakita sa ilang kabangis batok Mono Vampire dihang mirehistro sila og 31 ug 16 puntos matag usa. Ang reigning MVP nga si Ray Parks Jr. mitampo og nuybe puntos.
Unang giatangan ang Mono Vampire nga maoy muputol sa nagkutay nga daog sa Alab dihang gikuha nila ang champion import sa Magnolia Hotshots sa miaging Governors Cup nga si Romeo Travis, apan wala kini makaduwa tungod sa injury.
Ang Alab sunod moduwa batok Macau Black Bears karong Miyerkules didto sa Macau Sports Complex.
Sundan kini sa laing road game batok Singapore Slingers sa Marso 3 didto sa OCBC Arena sa Singapore.