CEBU, Philippines — Misaad si Cebu-based Nigerian mixed martial artist Simeon Uchenna nga mohatag og dungog sa Sugbo sa main event sa "MMA Super Fights" karong Sabado didto sa Dapitan City.
Si Uchenna nga nagbansay sa Yaw-Yan ArDigma Cebu ni Master Benigno 'Ekin' Caniga Jr., laraw nga mosakmit sa ikaduha niyang sunod-sunod nga daog batok ni Ivan Lugatiman sa Equilibrium MMA sa Cagayan de Oro City.
"I think of myself as a Cebuano. Yaw-Yan is my family and I treat Master Ekin as my father. I will do everything to represent Cebu well," matud pa ni Uchenna nga mihimo sa iyang amateur MMA debut niadtong Agosto sa miaging tuig diin iyang gipilde ang veteran nga si Rodel Valisado pinaagi sa split decision.
Gawas ni Uchenna, si Master Ekin naglaum usab og laing daog gikan sa walay pildeng si Allan Albindo nga makigsangka ni Johnrel Dionson sa D' Power MMA sa Dipolog.
Si Albindo lab-as pa sa iyang kadaogan niadtong Pebrero 8 diin iyang gibalian si Jessie Cabalquinto didto sa Sogod, Cebu.
"We want to sustain his (Albindo) momentum after his win. Allan is fighting a great striker with boxing background but I am confident that he will score another victory," matud pa ni Master Ekin.