CEBU, Philippines – Masaligon kaayo si Adrien Broner nga iyang mabihag si Manny Pacquiao sa ilang sangka karong Domingo diin depensaan ni Pinoy'ng boksidor ang iyang WBA welterweight title didto sa MGM Grand Garden Arena sa Las Vegas, Nevada.
Biya man tuod siya sa tapad, apan si Broner miingon nga angayan magmatngon si Pacquiao ilabi na kay wala pa kini makasugat og usa ka boksidor nga sama kaniya og kalibre.
Bisan usa pa ka eight-division world champion si Pacquiao, si Broner wala mahadlok niini kay sayod siya sa iyang kapasidad nga pakuratan ang kalibotan sa boksing unya sa adlaw sa away.
Sila si Broner ug Pacquiao mihimo sa katapusang press conference sa ilang sangka kagahapon didto sa David Cooperfield Theatre sa MGM Grand.
Sa iyang bahin, si Pacquiao nagpanikad sab nga moabli og bag-ong panid sa iyang karera.
Gipadayag ni Pacquiao nga gibati siya og tumang kahinam nga moaway sa labing unang higayon nga usa na siya ka 40-anyos.
Dako kining hagit alang kaniya, apan andam si Pacquiao nga pamatud-an nga ang edad numero lamang ug sa edad nga 40 hait ug bangis gihapon siya nga boksidor.
Kun gusto ba niyang palukapahon si Broner, si Pacquiao mitubag nga maabot ra kini kun adunay oportunidad.