CEBU, Philippines — Si Kyle Kuzma mipabuhagay og career-high 41 puntos aron pangulohan ang Los Angeles Lakers ngadto sa 113-100 nga kadaogan batok sa Detroit Pistons, ug inaton ang ilang record ngadto sa 3-5 nga wala si LeBron James sa NBA kagahapon didto sa Staples Center sa Los Angeles, California.
Mangtas kaayo si Kuzma mibugwak og 22 puntos sa ikatulong kuwarter diin siya miposa og upat ka tres nga gikahimuot og maayo sa bagang panon sa ilang fans.
Sa pagratsada ni Kuzma ang Lakers miposte og 16 puntos nga labaw.
Wala na makasikit pa ang Pistons ilabi na kay gilabhan gihapon sila sa Lakers sa katapusang kuwarter, 34-23.
Gawas ni Kuzma, nagparamdam sab si Michael Beasley sa ika-30 nga sumad sa adlaw niyang natawhan pinaagi sa pag-iskor og 15 sa iyang 19 puntos sa ikaupat nga kuwarter.
Si Blake Griffin, nga dunay average nga 25.3 puntos sa Pistons karong season, nalimitahan ngadto lamang sa 16 puntos ug sulagma kaayo nga wala makalangkat bisan og usa ka rebounds.
Sila si Andre Drummond ug Reggie Jackson nagkumboya og 32 puntos alang sa Pistons nga napilde kaunom sa miagi nilang pito ka duwa.