CEBU, Philippines – Ang head coach sa Toronto Raptors nga si Nick Nurse gipamulta og $15,000 (P750,000) gumikan sa iyang pagsaway sa mga reperi atol sa ilang kapildihan ngadto sa Denver Nuggets niadtong Lunes.
Miulbo ang kaspa ni Nurse sa pamaagi sa mga reperi pagtawag sa duwa sa dihang ang Raptors gipayaka sa Nuggets, 95-86 didto sa Pepsi Center.
Apil sa gipuntariya ni Nurse mao ang wala nila pagtawag sa klaro kaayong mga fouls batok ni Kawhi Leonard.
Gumikan sa maong hait nga mga komento, gisilotan si Nurse. Gikompirmar kini ni Kiki VanDeWeghe, ang NBA executive vice president of basketball operations.
Sa iyang bahin, si Leonard nagkanayon nga wala siya maglagot sa mga reperi gumikan kay naanad na man siya niini.
Ang Raptors mao karon ang nagkupot sa labing nindot nga record sa NBA karon nga season sa ilang 23-9 nga baraha.